श्रमको शरम

मेरा चाउरीएको गाला
मैले हिँडेका सँघर्षको नक्सा हो
मेरो पसिनाको गन्ध
साँझमा मगमगाउने रण्डिफुलको भन्दा मिठो लाग्छ
तिम्रो लागी यो “शरम”को कुरा हुन सक्ला
तर मेरो लागी यो, “श्रम”को कुरा हो ।।।

शरमको अन्त्य पछी नै
बोक्न थालेको हुँ मैले डोकोभरिको भारी
समात्न सुरु गरेको हुँ
चरि चु्च्चे “च” जस्तो हलोको”अनु”
हिलोले खुट्टा खाउन्जेल लगाएको हुँ आली
अनि त मेरो छोरोले पेटभरी माम खायो

शरमको अन्त्यपछी नै
फुटाएको हुँ मैले ढुंगा र बनाएँ गिटी
खोला चालेर निकालेको हुँ बालुवा
र त मेरो छोरो अहिले “क पुरी क” पढ्न पाउँदै छ
तर स्मरण रहोस् , मेरो छोरोले “क पुरी क” भन्दा पहिला “कोदाली त” पढेको हो

अगस्ट १८, २०१८ 
राजधानी

Comments
Share This